वि.पी. कोइराला
सर्वोच्च अदालतका न्यायाधीस एवम् मेलमिलाप परिषदका अध्यक्ष माननीय कुमार रेग्मीले विवाद समाधानका लागि वैकल्पिक उपायका रुपमा संविधान प्रदत्त मेलमिलाप विधिलाइ तिव्रता दिइने बताउनुभएको छ ।जनअधिकार संरक्षण मञ्च र ज्ञानपुञ्ज स्कुल अफ लिडरसिपको संयुक्त प्रयासद्वारा आयोजित ८ दिवसिय मेलमिलाप तालिमको समापन एवम् प्रमाणपत्र वितरण कार्यक्रममा बोल्दै उहाँले अदालतको प्रक्रियागत जटिलताबाट बच्न र दिगो शान्तिका लागि मेलमिलाप नै भरपर्दो उपाय रहेको बताउनुभयो । हाल मेलमिलापको बढ्दो लोकप्रियता र आवश्यकतालाई मध्यनजर गर्दै मेलमिलाप कर्ता बन्न शैक्षिक योग्यता स्नातक रहेकोमा मापदण्ड परिमार्जन गरेर माध्यमिक तहमा झार्ने तयारी भइरहेको उहाँले जानकारी दिनुभयो ।
कार्यक्रममा बोल्दै जन अधिकार संरक्षण मञ्चका प्रमुख प्रशिक्षक एवम् अधिवक्ता सतीश कुमार शर्माले न्यायसम्मको पहुँचमा मेलमिलापले सहजता ल्याउनुका साथै छिटोछरितो र कम खर्चिलो हुने बताउनुभयो । मेलमिलापबाट हुने समाधानहरू वास्तविक र दिगो हुनुका साथै सामाजिक मुल्य, मान्यता र संस्कृतिले पनि स्थान पाउँने भएको भन्दै उहाँले मेलमिलापको अभियानमा जोडिन आह्वान गर्नुभयो । यस्तै कार्यक्रममा बरिष्ठ अधिवक्ता मातृका प्रसाद निरौलाले मेलमिलापकर्ताको भविष्य उज्वल रहेके भन्दै आचारसंहिता र विधिमा रहेर समाजमा नमुना प्रस्तुत गर्न आग्रह गर्नुभयो । कार्यक्रममा मेलमिलाप परिषद् सचिवालय प्रमुख अर्जुन प्रसाद कोइराला, मेलमिलाप अभियन्ताहरु क्रमश: अधिवक्ता पेशल कुमार लुइटेल, अधिवक्ता सागर बगाले लगायतले समाजमा जाँदा पक्षहरूलाई स्वतन्त्र र निष्पक्ष तरिकाले सहयोग गर्न, निष्पक्षता, वस्तुनिष्ठता, स्वच्छता र न्यायका सिद्धान्तबाट निर्देशित भइ मेलमिलाप कर्ताका रुपमा कार्य गर्न आग्रह गर्नुभयो ।
कार्यक्रमको समापन समयमा बोल्दै ज्ञानपुञ्ज स्कुल अफ लिडरसिप प्रालिका कार्यकारी अध्यक्ष हरिप्रसाद डुम्रेले मेलमिलापसम्बन्धी ऐन र स्थानीय तहको हकमा न्यायिक कार्यविधि ऐनमा स्नातक उत्तीर्ण गरेको, २५ वर्ष उमेर पुरा भएको, स्थानीय स्तरमा समाजसेवीको रूपमा पहिचान बनाएको, राजनीतिक दलको सक्रिय कार्यकर्ता नभएको, ४८ घण्टा तालिम लिएको व्यक्ति मेलमिलापकर्ता बन्न सक्ने व्यवस्था रहेको स्मरण गराउँदै गुणस्तरीय तालिम प्रदान गरेर मेलमिलाप अभियन्ता तयार गर्ने अभियानमा आफु कटिबद्ध भएर लागिपरेको बताउनुभयो । कार्यक्रममा २७ जना प्रशिक्षार्थीहरुको सहभागिता रहेको थियो । ४८ घण्टे मेलमिलाप सम्बन्धि तालिम लिएपछि गाउँ टोलमा भएका विवादहरुलाई समाधान गर्न आफुहरु सक्षम भएको महसुस गरेको उनीहरुको प्रतिक्रिया थियो ।
