इरानसँग आज नेपालको मैत्रीपूर्ण फुटबल

काठमाडौं :  नेपाली महिला फुटबल टोलीले आज इरानसँग मैत्रीपूर्ण खेल खेल्दैछ। भारतको शिलोङस्थित जवाहरलाल नेहरु रंगशालामा हुने खेल साँझ सवा ६ बजे सुरु हुनेछ।

उज्बेकिस्तानमा सम्पन्न महिला एसियन कप छनोटपछि नेपालले पहिलोपटक अन्तर्राष्ट्रिय खेल खेल्न लागेको हो। टोलीमा विदेशमा व्यावसायिक फुटबल खेलिरहेका प्रिति राई, सावित्रा भण्डारी (साम्बा), पूजा राई र एन्जिला तुम्बापो सुब्बा समेत समावेश छन्।

नवनियुक्त प्रशिक्षक नबिन न्यौपानेको नेतृत्वमा नेपाल पहिलोपटक मैदानमा उत्रिँदैछ। उनले प्री–म्याच कन्फरेन्समा टोलीलाई आक्रामक रणनीतिका साथ मैदानमा उतार्ने र यी खेलमार्फत नयाँ खेलाडीहरूको परीक्षण गर्ने बताए।

नेपालले इरानसँगको खेलपछि १० गते भारतसँग दोस्रो मैत्रीपूर्ण खेल खेल्नेछ। त्यसपछि १३ कात्तिकमा भारतसँग अर्को अनअफिसियल खेल पनि तय भएको छ।

फिफा वरियतामा भारत ६३औं, इरान ७०औं र नेपाल ८९औं स्थानमा छन्। नेपालले इरानसँग यसअघि सन् २०१९ मा भारतमै आयोजित हिरो महिला गोल्डकपमा प्रतिस्पर्धा गरेको थियो। सो खेलमा नेपालले ३–० को जित हात पारेको थियो, जसमा सावित्रा भण्डारीले दुई गोल र अनिता बस्नेतले एक गोल गरेकी थिइन्।