काठमाडौं : नेकपा (एमाले) का केन्द्रीय सदस्य महेश बर्तौलाले देशको शान्ति–सुरक्षा र आगामी फागुन २१ गते हुने प्रतिनिधि सभा निर्वाचनको प्रमुख चुनौती नै गृहमन्त्री ओम अर्याल भएको आरोप लगाएका छन्।
सामाजिक सञ्जाल फेसबुकमा मंगलबार लेख्दै उनले गृहमन्त्री अर्यालले जेनजी युवाहरूको शान्तिपूर्ण प्रदर्शनमा घुसपैठ गराई तोडफोड र हिंसात्मक गतिविधि फैलाउने कार्यको नर्सरीका मुख्य ‘माली’ भएको निष्कर्ष निस्कने दाबी गरेका छन्।
बर्तौलाले लेखेका छन्, “गृहमन्त्री अहिलेसम्म पनि ईर्ष्या, डाह, कुण्ठा र आक्रोशभन्दा बाहिर निस्कन सकेका छैनन्। उनी लुटिएका हतियार खोज्दैनन्, प्रहरीको मनोबल उठाउने प्रयास गर्दैनन्, भागेका कैदीबन्दी कहाँ छन् भन्ने चासो राख्दैनन्।”
उनले पछिल्ला दिनमा हत्या र हिंसाका घटना बढ्दासमेत गृहमन्त्रीमा कुनै चिन्ता नदेखिएको आरोप लगाएका छन्। बर्तौलाका अनुसार, गृहमन्त्रीले शान्ति र स्थिरता भङ्ग गरी मुलुकमा अराजकता र अस्थिरता बढाउने गरी शीर्ष नेताहरूलाई भड्काउने र झूटा अभिव्यक्ति दिने काम गरिरहेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |