काठमाडौं : मधेश प्रदेशका मुख्यमन्त्री सतिशकुमार सिंह शनिबार साँझ स्विट्जरल्यान्ड प्रस्थान गरेका छन्। ‘अन्तर–सरकारी सहकार्य र संघीय प्रणालीमा प्रतिस्पर्धात्मकता’ विषयक अन्तरक्रिया कार्यक्रममा सहभागी हुन उनी स्विट्जरल्यान्ड पुगेका हुन्।
मुख्यमन्त्री सिंह भदौ २१ गते स्वदेश फर्कने उनको कार्यक्रम छ। संघीय प्रणालीमा अन्तर–सरकारी सहकार्य र प्रतिस्पर्धात्मकतासम्बन्धी अन्तर्राष्ट्रिय अनुभव आदान–प्रदान गर्न यो भ्रमणलाई महत्वपूर्ण मानिएको छ।
यसअघि भदौ ६ गते उनले मलेसिया भ्रमण गरेका थिए। क्वालालम्पुरमा चार दिनको बसाइँका क्रममा सिंहले नेपाली दूतावासमार्फत आप्रवासी श्रमिकहरूसँग भेटघाट गरी अवस्थाबारे जानकारी लिएका थिए।
आठ दिनमै दोस्रो विदेश भ्रमणमा निस्किएका सिंहको अनुपस्थितिमा मधेश प्रदेशको कार्यवाहक मुख्यमन्त्रीको जिम्मेवारी फेरि पनि भौतिक पूर्वाधार विकास मन्त्री सरोजकुमार यादवलाई दिइएको छ।
