काठमाडौं : नेपाल कम्युनिस्ट पार्टी (एमाले) को सचिवालय बैठक आज बस्ने भएको छ ।
भोलिदेखि सुरु हुने दोस्रो विधान महाधिवेशनको अन्तिम तयारी स्वरुप बैठक डाकिएको हो । बैठक अपरान्ह तीन बजे पार्टी मुख्यालय च्यासलमा सुरु हुने एमालेले जनाएको छ । महाधिवेशनलाई भव्य बनाउन भन्दै पार्टी व्यस्त भइरहे पनि विधान संशोधन प्रस्तावले नेताहरूबीच मतभेद चुलिएको छ। विशेषतः ७० वर्षे उमेरहद हटाउने विषय विवादको केन्द्रमा छ।
ललितपुरको गोदावरीस्थित सनराइज हलमा भदौ २० देखि २२ गतेसम्म महाधिवेशन हुने कार्यक्रम छ। उद्घाटन अध्यक्ष एवं प्रधानमन्त्री केपी शर्मा ओलीले शुक्रबार बिहान ११ बजे गर्नेछन्। महाधिवेशनमा २ हजार ३४१ प्रतिनिधि सहभागी हुने जनाइएको छ।
महाधिवेशनमा अध्यक्ष ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधन प्रस्ताव र महासचिव शंकर पोखरेलले संगठनात्मक प्रतिवेदन पेस गर्ने तय भएको छ। तर उमेरहद कायम गर्नुपर्ने भन्दै उपाध्यक्ष सुरेन्द्र पाण्डे, युवराज ज्ञवालीलगायत नेताहरू फरक धारमा उभिएका छन्। ओली पक्ष भने विवादास्पद विषय महाधिवेशनसम्म पुर्याउनै नदिने रणनीतिमा छ।
