काठमाडौं : प्रधानमन्त्री केपी शर्मा ओली आज स्वदेश फर्कँदै छन्। विकासका लागि वित्तसम्बन्धी चौथो अन्तरराष्ट्रिय सम्मेलनमा सहभागी हुन असार १४ गते स्पेन गएका ओली आज अपराह्न ३ : ४५ बजे त्रिभुवन अन्तरराष्ट्रिय विमानस्थलमा अवतरण गर्ने कार्यक्रम छ ।
भ्रमणका क्रममा प्रधानमन्त्री ओलीले संयुक्त राष्ट्रसंघका महासचिव एन्टोनियो गुटेर्रेस, स्पेनका प्रधानमन्त्री पेड्रो साञ्चेज, स्टोनियाका राष्ट्रपति अलार कारिस, इजिप्टका प्रधानमन्त्री मोस्तफा कमाल माडबुली र पोर्चुगलका प्रधानमन्त्री लुइ मोन्टेनेग्रोसँग अलग–अलग भेटवार्ता गरेका थिए।
प्रधानमन्त्री ओलीले सम्मेलनलाई सम्बोधन गर्दै अल्पविकसित मुलुकहरूको आर्थिक विकासका लागि अन्तरराष्ट्रिय सहकार्य अपरिहार्य रहेको धारणा राखेका थिए। साथै, उनले सम्मेलनअन्तर्गत आयोजित ‘विकास सहायतामा नयाँ सोच’ शीर्षकको उच्चस्तरीय छलफलसत्रको पनि सम्बोधन गरेका थिए।
भ्रमण अवधिभर प्रधानमन्त्री ओलीको विभिन्न साइड इभेन्टहरूमा समेत सहभागिता रहेको प्रधानमन्त्रीको सचिवालयले जनाएको छ। अल्पविकसित मुलुकहरूको उच्चस्तरीय बैठकको अध्यक्षता गर्दै उनले दिगो विकास लक्ष्य प्राप्तिमा वित्तीय स्रोत परिचालन गर्न विकास साझेदारहरूलाई आग्रह गरेका थिए।
स्पेन बसाइका क्रममा उनले म्याड्रिडस्थित विश्वप्रसिद्ध फुटबल क्लब रियल म्याड्रिडको सान्टियागो बर्नाबाउ रंगशाला अवलोकन गरेका थिए। त्यस्तै, नेपाली दूतावासको निरीक्षण तथा स्पेनमा रहेका नेपाली समुदायसँग पनि छलफल गरेका थिए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |