काठमाडौं : संघीय संसद्का दुवै सदनको बैठक आज बस्दै छन्। प्रतिनिधिसभाको बैठक अपराह्न १ बजे संघीय संसद् भवन, नयाँ बानेश्वरमा बस्नेछ भने राष्ट्रियसभाको बैठक अपराह्न १२ः१५ बजे बस्ने तय भएको छ ।
प्रतिनिधिसभाको बैठकमा ‘संघीय निजामती सेवा विधेयक, २०८०’ पारित गर्ने कार्यसूची तय गरिएको छ। मुलुक संघीय संरचनामा गएपनि प्रशासनिक संघीयताको कार्यान्वयनमा जटिलता देखिँदै आएको अवस्थामा यो विधेयक पारित हुने तयारी गरिएको हो। यसअघि असार ३ गते सो विधेयक पारित गर्ने भनिए पनि अन्तिम समयमा रोकिएको थियो।
संघीय मामिला तथा सामान्य प्रशासनमन्त्री राजकुमार गुप्ताले राज्य व्यवस्था तथा सुशासन समितिको प्रतिवेदनसहित विधेयकमाथि छलफलका लागि प्रस्ताव पेश गर्ने कार्यक्रम तय भएको छ। सांसदहरूले धारणा राखेपछि विधेयक पारित गरिनेछ।
प्रतिनिधिसभाबाट पारित भएपछि विधेयक राष्ट्रियसभामा पठाइनेछ। राष्ट्रियसभाले पारित गरेपछि पुनः प्रतिनिधिसभामा फिर्ता आउनेछ र सभामुखमार्फत राष्ट्रपतिसमक्ष प्रमाणीकरणका लागि पेश गरिनेछ। प्रमाणीकरणपछि मात्र विधेयक कार्यान्वयनमा आउनेछ।
यता, राष्ट्रियसभाको बैठकमा विनियोजन विधेयक, २०८२ अन्तर्गत १४ वटा मन्त्रालयका शीर्षकमाथि समूहीकृत छलफल हुने सम्भावित कार्यसूची तय गरिएको छ। संसद्मा आजको बैठकमार्फत चालु आर्थिक वर्षका प्रमुख विधेयकहरूमा निर्णायक प्रगति हुने अपेक्षा गरिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |