सरकारबाट बाहिरिने नागरिक उन्मुक्तिको घोषणा

काठमाडौं : सुदूरपश्चिम प्रदेशमा आफ्ना मन्त्री रामेश्वर चौधरीलाई बर्खास्त गरेपछि नागरिक उन्मुक्ति पार्टीले सरकारबाट बाहिरिने घोषणा गरेको छ।

पार्टीका संरक्षक रेशम चौधरीले बिहीबार अन्नपूर्णसँग कुरा गर्दै अबदेखि प्रदेश र संघ दुबै तहमा प्रतिपक्षमा बस्ने बताएका हुन्।

मुख्यमन्त्री कमलबहादुर शाहले मन्त्री चौधरीलाई ुदादागिरी शैलीु मा हटाएको आरोप लगाउँदै चौधरीले भने, “यो गठबन्धन प्रदेश मात्र होइन, संघसम्म फैलिएको हो। तर, आज जुन शैलीमा मन्त्री हटाइयो, त्यो सैह्य छैन। हामी प्रतिपक्षमा जान्छौं।”

उनले संघीय सरकारमा पर्यटन राज्यमन्त्री रहेका अरुणकुमार चौधरीलाई राजीनामा दिन निर्देशन दिएको समेत बताए।

मुख्यमन्त्री सचिवालयका अनुसार मन्त्री चौधरीलाई केही दिनअघि राजीनामा दिन भनिएपनि अवज्ञा गरेपछि उनलाई पदमुक्त गरिएको हो। यो घटनाले सुदूरपश्चिममा सत्तारूढ गठबन्धनमा भएको तनाव सतहमा आएको छ भने अब त्यसले संघीय राजनीति पनि प्रभावित पार्ने संकेत देखिएको छ।