काठमाडौं : उद्योग, पर्यटन, वन तथा वातावरणमन्त्री रामेश्वर चौधरीलाई बर्खास्त गरेपछि नागरिक उन्मुक्ति पार्टी (नाउपा) सुदूरपश्चिम प्रदेश संसदीय दलको आकस्मिक बैठक आज बस्दैछ।
बिहान १० बजे दलको कार्यालयमा बस्ने बैठकले सरकारसँगको समर्थनबारे निर्णय गर्ने संसदीय दलका नेता घनश्याम चौधरीले जानकारी दिए । पार्टी केन्द्रको निर्देशनअनुसार सरकारबाट बाहिरिने तयारी भएको बताइएको छ । नाउपा केन्द्रीय अध्यक्ष रञ्जिता श्रेष्ठले बिहीबारै संघ र प्रदेश दुवै सरकारबाट समर्थन फिर्ता लिने घोषणा गरेकी थिइन्। यद्यपि सो निर्णयबारेको औपचारिक पत्र अझै संसदीय दलमा आएको छैन।
सुदूरपश्चिममा नेपाली कांग्रेसको नेतृत्वमा नेकपा एमाले र नाउपाको गठबन्धन सरकार छ। कांग्रेसका १८, एमालेका ११ र नाउपाका ७ सांसद छन्। नाउपाले समर्थन फिर्ता लिए पनि सरकार अल्पमतमा नपर्ने अवस्था देखिन्छ। प्रारम्भिक समर्थन नदिएकाले मुख्यमन्त्री कमलबहादुर शाहले विश्वासको मत लिनुपर्ने संवैधानिक बाध्यता छैन।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |