ह्युमपाइप बगाएपछि बनेपा–नाला–ताथली सडक पुनः अवरुद्ध

काठमाडौं :  ह्युमपाइप राखेर आइतबारबाट अस्थायी रूपमा सञ्चालनमा ल्याइएको बनेपा–नाला–ताथली सडक पुनः अवरुद्ध भएको छ। आइतबार साँझको बाढीले ह्युमपाइप बगाएपछि उक्त सडक खण्डमा पुनः यातायात ठप्प भएको हो।

अरनिको राजमार्गको वैकल्पिक मार्गका रूपमा प्रयोग हुँदै आएको उक्त सडक खण्डमा शुक्रबार राति बनेपा नगरपालिका–१ र ४ को सिमानामा पर्ने पुण्यमाता खोलामा रहेको झण्डै ४५ वर्ष पुरानो पुल भाँचिएको थियो। त्यसपछि अस्थायी रूपमा ह्युमपाइप राखी सडक सञ्चालनमा ल्याइएको थियो।

शनिबार राति मालवाहक गाडी पुल पार गरेलगत्तै पुल भासिएको स्थानीयले जानकारी दिएका छन्। पुल भाँचिएपछि नाला र भक्तपुरको च्यामासिङ सडक खण्ड पूर्ण रूपमा अवरुद्ध भएको थियो। अस्थायी समाधानस्वरूप ह्युमपाइप राखिएको सडक पुनः बाढीले बगाएपछि अवरुद्ध भएपछि राजधानी काठमाडौँ आउजाउ गर्ने सवारी साधन प्रभावित भएका छन्।

हाल धुलिखेल–सुर्यविनायक सडकखण्डको विस्तार कार्य चलिरहेका कारण अरनिको राजमार्गमा नियमित सवारी अवरुद्ध हुँदै आएको छ। वैकल्पिक मार्गको रूपमा प्रयोग हुँदै आएको यो सडक भासिएपछि काठमाडौँको पूर्वी नाका हुँदै आउजाउ गर्ने सवारीलाई थप समस्या भएको छ।

स्थानीय प्रशासन र ट्राफिक कार्यालयले तत्काल वैकल्पिक उपायबारे छलफल सुरु गरेको छ भने स्थायी पुल पुनः निर्माणका लागि आवश्यक पहल थालिने जनाइएको छ।