काठमाडौं : अध्यागमन कानुन उल्लंघन गरेको आरोपमा न्यूजिल्याण्ड सरकारले दुई नेपाली नागरिकलाई देशनिकाला (डीपोर्ट) गरेको छ।
क्षेत्री र पहारी थर भएका ती दुई जना नेपालीलाई स्थानीय अध्यागमन अधिकारीले कानुनविपरीत बसोबास तथा कार्यस्थलको नियम उल्लंघन गरेको आरोपमा न्यूजल्यान्डबाट फिर्ता पठाइएको हो। दुबै नेपाली सिंगापुर एयरलाइन्समार्फत सिंगापुर हुँदै सोमबार मात्रै काठमाडौं आइपुगेका छन्।
उनीहरूलाई अध्यागमनको कुन धारा वा प्रावधानअनुसार दोषी ठहर गरिएको भन्नेबारे भने स्पष्ट खुलाइएको छैन। यद्यपि, अध्यागमन कानुनअनुसार भिसाको सर्त उल्लंघन, अनुमति नपाई काम गर्ने, बसोबासको नियम तोड्ने वा झुटा कागजात पेश गर्नेजस्ता गतिविधि हुँदा डीपोर्टको कारवाही हुने गरेको छ ।
न्यूजिल्याण्ड, अष्ट्रेलिया, बेलायत, अमेरिका लगायतका विकसित राष्ट्रहरूमा आकर्षक कामको खोजीमा जाने नेपालीहरूको संख्या बढ्दो छ। तर, नियमबिना वा गलत सूचना पेस गरेर जानेलाई पछिल्लो समय यस्ता कडा कारवाही भोग्नुपरेको छ।
