काठमाडौं : नेपाली कांग्रेसको आज बसेको पदाधिकारी तथा पूर्वपदाधिकारी बैठक आगामी कात्तिक १७ गते रुपन्देही क्षेत्र नम्बर ३ मा हुने उपनिर्वाचनमा केन्द्रित भएको छ।
उपनिर्वाचनबारे छलफल गर्न सभापति शेरबहादुर देउवाले पार्टीका पदाधिकारी र पूर्वपदाधिकारीबाहेक रुपन्देही कांग्रेसका सभापति रामकृष्ण खाण र कांग्रेसका लुम्बिनी प्रदेश सभापति अमरसिंह पुनलाई समेत बैठकमा बोलाएका थिए। २०७९ सालको निर्वाचनमा रुपन्देही ३ बाट तत्कालीन गठबन्धनको उम्मेदवार बन्दै पराजित भएका बालकृष्ण खाण पनि बैठकमा उपस्थित थिए।
राष्ट्रिय प्रजातन्त्र पार्टीका उम्मेदवार दीपक बोहोराको निधन भएपछि उक्त क्षेत्रमा उपनिर्वाचन हुने भएको हो । बैठकमा पदाधिकारी तथा पूर्वपदाधिकारीबाहेक गृहमन्त्री रमेश लेखक, ऊर्जा, जलस्रोत तथा सिँचाइमन्त्री दीपक खड्का, र कृषि तथा पशुपक्षी विकासमन्त्री रामनाथ अधिकारीको पनि सहभागिता थियो।
