पर्सा : पर्साको ठोरी गाउँपालिका–४, निर्मलबस्तीमा करिब १ हजार घरधुरी लाभान्वित हुनेगरी निर्माण सम्पन्न भएको खानेपानी आयोजनाको आज उद्घाटन गरिएको छ।
संघीय खानेपानी मन्त्री प्रदीप यादवले २ लाख २५ हजार लिटर क्षमताको ओभरहेड ट्यांकी, डीप ट्युबवेल, पानी प्रशोधन केन्द्रसहित निर्मित आयोजनाको उद्घाटन गरेका हुन्। मन्त्री यादवले आफैं धाराको पानी पिएर आयोजनाको सुरुवात गरेका थिए। ठोरी गाउँपालिका अध्यक्ष लालबहादुर श्रेष्ठका अनुसार, यस आयोजनाबाट निर्मलबस्तीका २ हजार १६५ जना नागरिकले स्वच्छ र नियमित खानेपानी पाउनेछन्। मन्त्री यादवले विकासको आधार खानेपानी भएको बताउँदै तराई-मधेसको जलसंकट समाधान गर्न सरकार कटिबद्ध रहेको उल्लेख गरे।
उनले मधेस प्रदेशका ८ जिल्लालाई तीन महिनाका लागि विपद् संकटग्रस्त क्षेत्र घोषणा गरिएको पनि जानकारी दिए। यो आयोजना लामो समयदेखि खानेपानी अभाव झेल्दै आएका स्थानीयका लागि महत्वपूर्ण उपलब्धि बनेको छ।
