काठमाडौं : नेकपा (एकीकृत समाजवादी) की नेतृ रामकुमारी झाँक्रीले आफूलाई पार्टी अध्यक्ष माधवकुमार नेपालविरुद्ध बोलेको भन्दै स्पष्टीकरण सोधिएको भन्ने कुरा निराधार भएको जिकिर गरेकी छन् ।
मंगलबार पार्टी केन्द्रीय कार्यालय आलोनगरमा सञ्चारकर्मीहरूसँग कुराकानी गर्दै उनले ‘माधव नेपालविरुद्ध बोलेको आरोपमा स्पष्टीकरण सोधिएको’ भन्ने विषयमा अहिलेसम्म कुनै औपचारिक जानकारी नभएको प्रस्ट पारेकी हुन्।
उनले बुटवलमा आयोजित एक प्रशिक्षण कार्यक्रममा मरेको सिनो काँधमा बोकेर हिँड्न सकिँदैन, अध्यक्ष फेरौं भन्ने अभिव्यक्तिपछि आफू विवादमा तानिएको स्वीकार गरिन्।
तर सो भनाइको गलत व्याख्या भएको भन्दै पार्टीलाई नोक्सान नहोस् भनेर आफूले सचिवालय बैठकमै उपस्थित भएर विषय प्रस्ट्याउने चाहना राखेको बताइन्। पार्टी महासचिव घनश्याम भूसालले झाँक्रीको अभिव्यक्तिमाथि सार्वजनिक रूपमा ध्यानाकर्षण गराइसकेका छन्। तर झाँक्रीले पार्टीलाई हानी नहोस् भन्ने हेतुले आफैं उपस्थित भएर सबै भ्रम चिर्ने प्रयास गरिरहेकोू बताइन्।
पार्टीभित्र नेतृत्वको प्रश्न उठ्न थालेको, असन्तुष्ट स्वर बढ्दै गएको र नेतृ झाँक्रीजस्ता केही नेताले स्पष्ट धारणा सार्वजनिक गर्न थालेसँगै नेकपा एस भित्रको अन्तरद्वन्द्व चुलिँदै गएको संकेत देखिएको छ।
