काठमाडौं : शुक्रबार बिहान ११ बजेतिर काठमाडौँ महानगरपालिकाको कार्यपालिका बैठक सुरु भयो।
महालगायत प्रमुख अधिकृत, विभाग प्रमुखहरू र कार्यपालिका सदस्यहरू बैठक कक्षमा पुगिसकेका थिए। सबैको अपेक्षा थियो नगरसभा, बजेट तयारी, तथा ठूला योजनाबारे छलफल हुनेछ। तर दृश्य ठीक उल्टो देखियो। बैठक सुरु भएपछि महानगर प्रमुख बालेन शाहले छोटो घोषणा गरे—नगरसभा असार २९ गते बस्नेछ। अनि न बैठकको एजेन्डा पढियो, न छलफल भयो। यो भनाइसँगै प्रमुख शाह बैठक कक्षबाट बाहिरिए। त्यसपछि बैठक औपचारिक रूपमा सकियो । एक मिनेटभन्दा कम अवधिमा सम्पन्न भएको बैठकले सहभागीहरूलाई चकित बनायो ।
नगर कार्यपालिकाका लागि वर्षको यो सबैभन्दा संवेदनशील समय हो—बजेट निर्माण, योजनाको समिक्षा, नयाँ कार्ययोजना प्रस्ताव, र जनप्रतिनिधिका सरोकार प्रस्तुत गर्ने अवसर। तर राजधानीको स्थानीय सरकारको बैठक एक मिनेटमै टुंगिनु, लोकतान्त्रिक अभ्यासको गम्भीर सवाल बनेको छ।
गत वर्षहरूमा पनि बालेनको एकल निर्णयशैली, कम संवाद, र पारदर्शिताको कमीबारे आलोचना हुँदै आएको थियो। यो पटक कार्यपालिका बैठकलाई मात्र होइन, त्यसको प्रक्रियालाई पनि छायाँमा पारेको देखिन्छ।
अब नगरसभा २९ गते बस्नेछ। तर त्यो नगरसभा कत्तिको सहभागीमूलक र निर्णयात्मक हुनेछ भन्ने प्रश्न भने यो एक मिनेटको बैठकुले अझ प्रस्ट बनाइदिएको छ ।
