काठमाडौं : रुकुम पूर्वको सदरमुकाम रुकुमकोट तोक्ने निर्णयविरुद्ध पुनः सर्वोच्च अदालतमा रिट दायर भएको छ ।
सदरमुकाम तोक्दा मापदण्ड र प्रक्रियालाई बेवास्ता गरिएको भन्दै प्रतिनिधिसभा, प्रदेशसभा र स्थानीय तहका जनप्रतिनिधिहरूले संयुक्त रूपमा रिट दर्ता गराएका हुन्। रिट निवेदकमा कांग्रेसकी संघीय सांसद कुसुमदेवी थापा, माओवादी प्रदेश सांसद सुरुल पुनमगर र दिलकुमारी बुढामगर, एमालेकी सरिता पुनमगर, पुथा उत्तरगंगा गाउँपालिका अध्यक्ष पुनिराज घर्तीमगर र भूमेका अध्यक्ष होमप्रकाश श्रेष्ठ छन्।
साउन ७ मा प्रधानमन्त्री तथा मन्त्रिपरिषद् कार्यालयले सिस्ने गाउँपालिका-५ र ६ स्थित रुकुमकोटलाई सदरमुकाम तोकेको थियो। तर, सर्वोच्चले गत भदौ २७ मा मापदण्डसहित निर्णय गर्न सरकारलाई आदेश दिएको भन्दै रिट दर्ता गरिएको हो। सरकारले छलफलविनै जबर्जस्ती निर्णय गरेको भन्दै पुनः न्याय मागिएको निवेदकहरूको भनाइ छ।
