काठमाडौं : सभा हलको मञ्चमा थिए युवा तथा खेलकुद मन्त्री तेजुलाल चौधरी। अनुहारमा गम्भीरता थियो, स्वरमा यथार्थको भार। उनले भने, “देशमा रोजगारीको कमी छैन, तर युवाले देखेका छैनन्।” राष्ट्रिय युवा परिषद्को आयोजनामा आयोजित अन्तरक्रिया कार्यक्रममा, जसको मूल विषय थियो “रोजगारी र सीप विकास तालिमका क्षेत्र, माग र आवश्यकता पहिचान।” कार्यक्रम केवल औपचारिकतामा सीमित थिएन,त्यो थियो युवाको भविष्य र राष्ट्रको सम्भावनासँग गाँसिएको गम्भीर मञ्च।
मन्त्री चौधरीले देशमा गार्मेन्ट, कपाल काट्ने, निर्माण, गरगहना बनाउनेजस्ता क्षेत्रहरूमा ठूलो अवसर रहेको बताए। “छिमेकी देश भारत, पाकिस्तान र बंगलादेशका कामदारहरू नेपालमै काम गर्दै छन्,” उनले भने, “तर हाम्रा युवाहरू तलब पाइरहँदा पनि विदेश पलायन भइरहेका छन्।” उनका भनाइहरू कुनै किताबी भाषण थिएनन्। त्यो थियो, उनी स्वयंले देखेको यथार्थ-जहाँ भारत र बंगलादेशबाट इम्ब्रोइडरी, ज्वेलरीजस्ता सृजनात्मक कामका लागि विदेशी कामदार आउँछन्, र नेपाली मुद्राको बिदेश पलायन भइरहन्छ। “यो प्रवृत्तिले हामीले गुमाइरहेका सम्भावनाको संकेत गर्छ,” चौधरीको भनाइ थियो।
कार्यक्रमको अर्को छेउमा थिए, राष्ट्रिय युवा परिषद्का उपाध्यक्ष सुरेन्द्र बस्नेत। उनी युवाका स्वर सुन्ने पात्र मात्र होइनन्, समाधान खोज्ने भूमिकामा पनि देखिए। उनले बताए-देशका ७७ वटै जिल्लाका स्थानीय तहसँग समन्वय गरेर युवाहरूलाई सीप तालिममा सहभागी गराइनेछ। उनले ठोस तथ्य पनि प्रस्तुत गरे-“६० लाखभन्दा बढी युवा विदेशमा छन्, तर दैनिक १४ सयजना स्वदेश फर्किरहेका छन्।
यो अवसर हो, चुनौती होइन।” कार्यक्रममा सहभागी रोजगारदाता कम्पनीहरूका प्रतिनिधिहरूले पनि आफ्नो आवाज उठाए“हामीलाई सीपयुक्त जनशक्ति चाहिएको छ, तालिमपछि रोजगारी दिन तयार छौं।”
