काठमाडौं : संघीय संसद् अन्तर्गत दुई समितिको बैठक सोमबार बस्दै छन्। प्रतिनिधिसभाको कृषि, सहकारी तथा प्राकृतिक स्रोत समिति र राष्ट्रिय सभाको विधायन व्यवस्थापन समितिको बैठक आ-आफ्नो कार्यसूचीअनुसार बस्न लागेको हो।
कृषि समितिको बैठक बिहान ११ बजेका लागि बोलाइएको छ। बैठकमा ‘भूमिसम्बन्धी केही नेपाल ऐनलाई संशोधन गर्न बनेको विधेयक, २०८२’ का विषयमा छलफल हुनेछ। यस क्रममा समितिले गिरिबन्धु टी स्टेट र घर तथा आवास इकाइ (अपार्टमेण्ट) का प्रतिनिधिहरूसँग राय–सुझाव लिने तयारी गरेको छ।
यसैगरी, राष्ट्रिय सभाअन्तर्गतको विधायन व्यवस्थापन समितिको बैठक दिउँसो १ बजेका लागि तय गरिएको छ। बैठकमा ‘जलस्रोत विधेयक, २०८१’ को मस्यौदा प्रतिवेदनमाथि विस्तृत छलफल हुने कार्यसूची रहेको छ। दुवै समितिमा सरोकारवालासँगको परामर्शपछि विधेयक परिमार्जन वा पारित गर्नेसम्बन्धी प्रक्रिया अघि बढाउने तयारी छ।
