काठमाडौं : राष्ट्रिय स्वतन्त्र पार्टी (रास्वपा)ले घुस काण्डमा मुछिएका मन्त्रीहरूलाई कारबाही नगरेको भन्दै सरकारमाथि प्रश्न उठाएको छ ।
आइतबारको प्रतिनिधि सभा बैठकमा बोल्दै सांसद असीम साहले भिजिट भिसाको नाममा मानव तस्करीको आरोप लागेका गृहमन्त्री रमेश लेखकमाथि चासो व्यक्त गरेका हुन् । पूर्वमन्त्री राजकुमार गुप्ताको अडिओ सार्वजनिक भएपछि राजीनामा दिँदै उम्कन खोजिएको र अन्य संलग्नमाथि कारबाही नभएकोप्रति पनि उनले आपत्ति जनाए ।
प्रधानमन्त्रीले रास्वपालाई व्यवस्था विरोधी भनेकोप्रति असन्तुष्टि जनाउँदै साहले भने, ‘धूलो ऐनामा हैन, मन्त्रीहरूको अनुहारमा लागेको छ।’ रास्वपाले अडिओ प्रकरणको निष्पक्ष छानबिन र दोषीमाथि कारबाहीको माग गर्दै आएको छ ।
