काठमाडौँ : प्रधानमन्त्री केपी शर्मा ओली तेस्रो संयुक्त राष्ट्र संघीय भूपरिवेष्टित विकासशील राष्ट्रहरू (एलएलडिसी)सम्मेलनमा सहभागी हुन तुर्कमेनिस्तानको अवाजामा छन्।
उनले बुधबार सम्मेलनको ‘जलवायु परिवर्तन अनुकूलन क्षमताको अभिवृद्धि’ विषयक सत्रलाई सम्बोधन गर्ने कार्यक्रम छ। ओलीले ‘व्यापार, वाणिज्य र क्षेत्रीय सहकार्य’ विषयक छलफल सत्रको सहअध्यक्षता पनि गर्नेछन्। साथै उनले काजकस्तान, अजरबैजान र ताजकस्तानका राष्ट्रपतिसँग शिष्टाचार भेटवार्ता गर्ने कार्यतालिका छ।
साउन २० देखि २३ सम्म चल्ने सम्मेलनमा अफ्रिका, एसिया, युरोप र दक्षिण अमेरिकाका ३२ भूपरिवेष्टित राष्ट्र सहभागी छन्। समुद्रमा पहुँच नभएकाले अन्तरराष्ट्रिय व्यापार, पारवहन, यातायात लागत र पूर्वाधार अभावजस्ता समस्या समाधानमा छलफल केन्द्रित छ।
प्रधानमन्त्रीसँगै उनकी श्रीमती राधिका शाक्य, सल्लाहकारहरू, सांसद, सचिव र चिकित्सकसहितको प्रतिनिधिमण्डल अवाजामा रहेको प्रधानमन्त्रीको सचिवालयले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |