काठमाडौँ : एएफसी यु–२० महिला एसियन कप छनोट अन्तर्गत समूह ‘ए’ का खेलहरू बुधबारदेखि भुटानको थिम्पुमा सुरु हुँदै छन्।
समूह ‘ए’ मा परेको नेपालले घरेलु टोली भुटानविरुद्ध आज साँझ ५ ः ४५ बजे चाङलिमियाङ स्टेडियममा खेल्दै छनोट यात्रा सुरु गर्नेछ।
नेपाल महिला यु–२० टोली पहिलो पटक एसियन कप खेल्ने लक्ष्यसहित भुटान पुगेको हो। प्रतियोगिताको पूर्वसन्ध्यामा प्रशिक्षक यामप्रसाद गुरुङले टोली छनोटमा पुग्नेमा ढुक्क रहेको बताए।
समूहमा उत्तर कोरिया, साउदी अरब र भुटान छन्। मङ्गोलिया भने प्रतियोगिताबाट नाम फिर्ता लिएको छ। नेपालले समूह उपविजेता बन्ने लक्ष्य लिएको छ। हालै सम्पन्न साफ यु–२० च्याम्पियनसिपमा नेपाल उपविजेता बनेको थियो।
