काठमाडौं : वैदेशिक रोजगारीका क्रममा कुवेतमा रहेका ९ जना नेपालीको विषादीयुक्त मदिरा सेवनबाट ज्यान गएको छ ।
कुवेतस्थित नेपाली दूतावासका श्रम सहचारी गिरिप्रसाद आचार्यका अनुसार प्रारम्भिक अनुसन्धानमा मदिरामा विषादी मिसावट भएको देखिएको भए पनि मेडिकल रिपोर्ट आएपछि मात्र मृत्युको एकिन कारण पत्ता लाग्नेछ। मदिरा सेवनपछि अचेत भएका करिब ३५ जना नेपाली विभिन्न अस्पतालमा उपचाररत छन्।
आचार्यका अनुसार कुवेत सरकारले उनीहरूलाई सुविधा सम्पन्न अस्पतालमा उपचार गराइरहेको छ। दूतावासले अस्पताल भ्रमणका साथै फोनमार्फत पनि पीडितको अवस्थाबारे निरन्तर जानकारी लिइरहेको छ। कुवेतमा मदिरा सेवन गैरकानुनी रहेको उल्लेख गर्दै दूतावासले श्रमिकलाई यसबाट टाढा रहन आग्रह गरेको छ।
