काठमाडौं : गौरव नेतृत्वको नेपाल कम्युनिस्ट पार्टी (माओवादी) ले लिपुलेक, लिम्पियाधुरा र कालापानी क्षेत्रको रक्षा गर्न नेपाली सेना खटाउन सरकारसँग माग गरेको छ।
भारत र चीनबीच हालैको पुलान र गुन्जीलाई जोड्ने लिपुलेक व्यापारिक नाका पुनः सञ्चालनसम्बन्धी समझदारीप्रति आपत्ति जनाउँदै माओवादीले गम्भीर ध्यानाकर्षण गराएको हो। पार्टीका महासचिवको हस्ताक्षरयुक्त विज्ञप्तिमा ती क्षेत्रहरू नेपालको ऐतिहासिक भूमि भएको प्रष्ट्याइएको छ। विज्ञप्तिमा भनिएको छ, “दुई देशबीचको व्यापारिक सहमतिले नेपालको सार्वभौमिकतामाथि गम्भीर आघात पुगेको छ।
सरकारको मौनता आपत्तिजनक छ। त्यसैले भौगोलिक सुरक्षाका लागि सेना परिचालन गर्न जरुरी छ।” माओवादीले भारततर्फबाट सीमाक्षेत्रमा भइरहेको ‘आक्रामक गतिविधि’ प्रति पनि आपत्ति जनाउँदै आवश्यक परे जनमुक्ति सेनाले समेत ती क्षेत्रमा खटिने चेतावनी दिएको छ।
लिपुलेकबारे भारत र चीनले गरेको समझदारी नेपालका लागि अस्वीकार्य भएको भन्दै विज्ञप्तिमा ‘सरकारले कूटनीतिक पहलमार्फत भूमि कायम गर्न नसकेको’ उल्लेख छ। पार्टीले नेपाल सरकारलाई तत्काल कदम चाल्न आग्रह गर्दै सम्पूर्ण जनतालाई पनि सचेत रहन आह्वान गरेको छ।
