काठमाडौं : द्धन्द रूपान्तरणदेखि मेलमिलाप र राष्ट्रिय स्वाभिमानसम्म, समुदायको साझा आकांक्षालाई जोड्ने पर्वका रूपमा यस वर्ष पनि महालक्ष्मी नगरपालिका–३, बोझे पोखरी क्षेत्रमा भगवान गणेशको प्राकट्य दिवस उल्लासपूर्वक मनाइयो।
भाद्र शुक्ल चतुर्दशीका दिन बिहानैदेखि भक्तजनहरूको भीड बिष्ट टोलस्थित प्राचीन लालगणेश मन्दिरमा जम्मा भयो। त्यहीँबाट सुरु भएको धार्मिक यात्रा ललितादेवी, बोझे पोखरीस्थित सत्यश्वर महादेव, सत्यदेवी, मुचुकुण्डनाग, गौरामहेश्वर, सप्तऋषि, अर्यालटोलस्थित इन्द्रेश्वर महादेव हुँदै पैनाचल हनुम्लिङ्गेश्वर महादेवसम्म पुगेर फेरि बोझे पोखरीमै समापन भयो। बाटोभरि भक्तजनले मन्त्रोच्चारण गर्दै धूप–दीप प्रज्वलन गरे, स्थान–स्थानमा धार्मिक अनुष्ठान सम्पन्न भए।
यस परिक्रमा–पूजनलाई निरन्तरता दिँदै आएका लेखक तथा साधक धर्माचार्य केशव प्रसाद चौलागाईँका अनुसार, यस्ता धार्मिक अभ्यासले केवल संस्कारको निरन्तरता मात्र होइन, सम्पदा संरक्षण र सामाजिक सद्भावलाई पनि मजबुत बनाउँछ। उनका शब्दमा, “हाम्रा चाडपर्व द्धन्द व्यवस्थापन र मेलमिलापका लागि महत्वपूर्ण कडी हुन्।”
धर्म र आध्यात्मिकताको समाज रूपान्तरणमा हुने प्रभावबारे लामो समयदेखि अध्ययन गर्दै आएका चौलागाईँले ‘सिद्ध गणेश साधना’ नामक पुस्तकमार्फत पनि यही सन्देश दिएका छन्। उनका अनुसार ‘कलौ चण्डी विनायकौ’ भन्ने मान्यताअनुसार गणेश र देवी मन्त्रको पुरश्चरणले समाजमा सुशासन, शान्ति र समृद्धिको बाटो खोल्छ।
समुदायले समेत गणेश चतुर्थी पूजनलाई केवल धार्मिक पर्व मात्र नभई सामाजिक मेलमिलाप र द्धन्द रुपान्तरणको अभ्यासका रूपमा बुझ्ने गरेका छन्। बोझे पोखरी क्षेत्रमा वर्षेनी आयोजना हुने यो यात्रा धार्मिक परम्परा मात्र होइन, स्थानीय संस्कृति र साझा पहिचानलाई जोड्ने एउटा महत्वपूर्ण धरोहरका रूपमा प्रतिष्ठित बन्दै गएको छ।
