कास्की : नेकपा माओवादी केन्द्रका अध्यक्ष पुष्पकमल दाहाल प्रचण्डले सहकारी ठगी प्रकरणमा नेपाली कांग्रेस र नेकपा एमालेका नेताहरूको संलग्नता रहेको आरोप लगाएका छन्। नेपाल उद्योग व्यापार महासंघले पोखराको लेकसाइडमा आयोजना गरेको प्रशिक्षण कार्यक्रमलाई शनिबार सम्बोधन गर्दै अध्यक्ष प्रचण्डले सहकारी क्षेत्रका ठगहरूलाई कारबाही गर्न खोज्दा आफ्नै सरकार ढालिएको दाबी गरे।
‘शक्तिशाली प्राधिकरणमार्फत ठगहरूलाई कानुनी दायरामा ल्याउन पहल गर्दा सरकार नै ढालियो,’ उनले भने, ‘कांग्रेस र एमालेका नेताहरू सहकारी काण्डका जरा हुन्।’
उनले माओवादी आन्दोलन मध्यम वर्गको पक्षमा उभिएको दाबी गर्दै संविधान निर्माणजस्तो जटिल प्रक्रियामा माओवादीको निर्णायक भूमिका रहेको बताए। ‘संविधान बनाउन सजिलो थिएन, तर संघीय लोकतान्त्रिक गणतन्त्र ल्याउन माओवादी निर्णायक थियो,’ उनले भने।
उनका अनुसार माओवादीले उठाएका सबै लक्ष्य प्राप्त नभए पनि बाध्यात्मक राजनीतिक सम्झौतामार्फत ऐतिहासिक उपलब्धिहरू हासिल भएका छन्। पछिल्लो समय माओवादी घटक र ‘इमानदार कम्युनिस्ट’बीच सहकार्य र एकता बढ्दो क्रममा रहेको उल्लेख गर्दै उनले बिस्तारै विकल्प निर्माणको बाटो खुलेको संकेत पनि दिए।
