काठमाडौं : नेपाली कांग्रेसका महामन्त्री गगन थापाले पार्टीभित्र गलत व्यक्तिहरूको कारण बदनाम हुने क्रम रोक्न शुद्धीकरण अपरिहार्य भएको बताएका छन्। शनिबार काठमाडौंमा आयोजित पार्टी कार्यक्रमलाई सम्बोधन गर्दै उनले पार्टी स्वयं गलत नहुने तर पार्टीमा आबद्ध व्यक्तिहरूको गल्तीले संस्थाको छवि प्रभावित हुने तर्क प्रस्तुत गरे।
थापाले कांग्रेस स्थापनाकालदेखि नै राष्ट्रिय पार्टीका रूपमा स्थापित रहेकाले त्यसको सिद्धान्त र मूल्यमा विचलन नहुने गरी अगाडि बढ्नुपर्नेमा जोड दिए। उनले नेपाली राजनीतिमा बीपी कोइरालाको विचार अझै सान्दर्भिक रहेको उल्लेख गर्दै पार्टीले बीपीका विचारअनुसार नेतृत्वदायी भूमिका लिनुपर्ने बताए।
‘कांग्रेस डर र लोभबाट मुक्त हुनुपर्छ,’ थापाले भने, ‘सरकारमा जानु वा नजानु मुख्य कुरा होइन, जनताप्रति उत्तरदायी बन्ने बाटो रोज्नुपर्छ।’
उनले गठबन्धनको सन्दर्भमा चुनाव हार्ने डरले कांग्रेसले अरूको चुनाव चिह्नमा भोट हाल्नुपर्ने अवस्थाबाट बाहिरिनुपर्ने धारणा राखे। ‘लोभ र डरका आधारमा गरिने सम्झौताले कांग्रेस कमजोर बन्छ,’ उनले भने।
