काठमाडौं : भ्रष्टाचार र सामाजिक सञ्जाल बन्दको विरोधमा राजधानीमा भेला भएका जेनजीलाई काठमाडौं महानगरपालिकाले घुम्ती शौचालयको सुविधा उपलब्ध गराएको छ। माइतीघर मण्डलामा भइरहेका प्रदर्शनलाई सहज बनाउन राखिएको शौचालय निःशुल्क प्रयोग गर्न मिल्ने व्यवस्था गरिएको महानगरले जनाएको छ।
राष्ट्रिय झण्डा बोकेर सडकमा उत्रिएका युवाले ‘असन्तुष्टि चरम छ, नेताको गोजी गरम छ’, ‘जेनजी चिच्याउँछ, भ्रष्टहरूलाई गिज्याउँछ’जस्ता नारा लगाउँदै राष्ट्रभक्ति गीत गाएका छन्। कतिपय स्कुल–कलेजकै ड्रेसमा सहभागी भएका उनीहरूले विभिन्न प्लेकार्डसमेत बोकेका थिए।
प्रदर्शनलाई मेयर बालेन शाहले खुलेर समर्थन गरेका छन्। सहभागीहरूले सार्वजनिक सम्पत्ति नष्ट नगर्ने, तोडफोड वा आगजनी नगर्ने र शान्तिपूर्ण रूपमा आफ्नो असन्तुष्टि प्रकट गर्ने प्रतिबद्धता जनाएका छन्। राजनीतिक दलका नेता–कार्यकर्तालाई सहभागी नगराउने निर्णयसमेत उनीहरूले सार्वजनिक गरेका छन्।
घुसपैठ हुन सक्ने भन्दै सुरक्षाकर्मीको उपस्थिति बढाइएको छ। राजधानीसँगै रुपन्देही, दाङलगायत जिल्लामा पनि जेनजीले प्रदर्शन गरिरहेका छन्।
