काठमाडौं : भदौ २३ र २४ गते देशव्यापी रूपमा भएका जेन–जी आन्दोलनका क्रममा मृत्यु हुनेको संख्या ७२ पुगेको पुष्टि भएको छ।
प्रधानमन्त्री सुशीला कार्कीको पदभार ग्रहण कार्यक्रममा, मुख्यसचिव एकनारायण अर्यालले यो विवरण सार्वजनिक गरेका हुन् । अर्यालका अनुसार मृत्यु हुनेहरूमध्ये ५९ जना प्रदर्शनकारी, १० जना कैदीबन्दी, र ३ जना सुरक्षाकर्मी रहेका छन्। आन्दोलनमा १३३ जना प्रदर्शनकारी र ५७ जना सुरक्षाकर्मी घाइते भएका छन्, जसको विभिन्न अस्पतालहरूमा उपचार भइरहेको छ।
यसैबीच, काठमाडौं–७, बौद्धस्थित भाटभटेनी सुपर स्टोरको परिसरमा जलेको अवस्थामा आधा दर्जन मानव कंकाल फेला परेको छ। शनिबार रातिको प्रहरी अनुसन्धानमा पूर्ण रूपमा जलेका ६ वटा शव फेला परेका हुन्। प्रहरीका अनुसार ती शव आन्दोलनकै क्रममा मारिएकाहरूको हुनसक्ने अनुमान गरिएको छ, यद्यपि विस्तृत अनुसन्धान जारी छ। यता, प्रहरी महानिरीक्षक चन्द्रकुवेर खापुङले आज सार्वजनिक भिडियो सन्देश जारी गर्दै, आन्दोलनका क्रममा धेरै प्रहरी चौकीमा क्षति पुगेको र त्यसले कामकाजमा गम्भीर असर पारेको बताए ।
