काठमाडौं : सरकारले अध्यादेशमार्फत निर्वाचन कानुन संशोधन गरी मतदाता नामावली अद्यावधिक गर्ने तयारी गरेको छ ।
आज गृहमन्त्री ओमप्रकाश अर्यालले निर्वाचन आयोगका पदाधिकारीहरूसँग छलफल गर्दै, उमेर पुगेका तर नामावलीमा नपुगेका युवालाई मतदानको अवसर दिन कानुन संशोधन आवश्यक भएको बताएका हुन् । त्यस्तै, विदेशमा रहेका नेपाली नागरिकलाई समानुपातिक प्रणालीमार्फत मतदान गर्न पाउने व्यवस्था मिलाउने विषयमा पनि आयोगसँग सहमति भएको गृहमन्त्री अर्यालले जानकारी दिए । यसैबीच, निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले विद्यमान कानुन अनुसार नयाँ मतदाता नामावली संकलन असम्भव भएकाले कानुनी अवरोध हटाउनुपर्ने बताए ।
उनले सरकारले तोकेको समयमा निर्वाचन गराउन आयोग पूर्ण रूपमा सक्षम र तयार रहेको धारणा राखे । आयोगले फागुन २१ गतेका लागि तय गरिएको निर्वाचनको तयारी औपचारिक रूपमा शुरू भइसकेको जनाएको छ । आयोगका प्रवक्ता नारायण प्रसाद भट्टराईले हालको कानुनअनुसार चुनावको तयारी अगाडि बढाइएको बताए । तर, कतिपय नयाँ प्रावधान कार्यान्वयन गर्न सरकारसँग समन्वय आवश्यक रहेको उनको भनाइ छ ।
प्रधानमन्त्री सुशीला कार्की नेतृत्वको सरकारले प्रतिनिधिसभा विघटन गर्दै निर्वाचन मिति तय गरिसकेको छ । तर, वर्तमान कानुनअनुसार निर्वाचन मिति घोषणा भएपछि नयाँ मतदाता नामावली संकलन गर्न नपाइने प्रावधान रहेकोले त्यसलाई अध्यादेशमार्फत संशोधन गर्नुपर्ने आवश्यकता देखिएको छ ।
