काठमाडौँ : हालै भदौ २३ र २४ गते राजधानीमा भएको हिंसात्मक प्रदर्शनप्रति दुःख प्रकट गर्दै हाम्रो पार्टी नेपालले संविधान सुधार, सर्वपक्षीय राष्ट्रिय सरकार गठन र तत्कालीन सुधारका लागि सरकारलाई ११ बुँदे माग अघि सारेको छ।
पार्टीका संयोजक गोविन्द बोहरा (ब्रह्माण्ड)ले विज्ञप्ति जारी गर्दै निर्दोष नागरिकको ज्यान जाने, सयौं घाइते हुने र सार्वजनिक तथा निजी सम्पत्तिमा आगजनी हुने घटनाप्रति गहिरो संवेदना व्यक्त गरेका छन्। हिंसा र अराजकताप्रति अस्वीकृति जनाउँदै उनले राज्यको संवैधानिक दायित्वअनुसार दोषीमाथि छानबिन र कडा कारबाही हुनुपर्नेमा जोड दिएका छन्।
पार्टीले संविधान सुधारका लागि सर्वपक्षीय सहमतिमा राष्ट्रिय नागरिक सरकार गठन गरी संविधान सुझाव आयोगमार्फत देशभरबाट सुझाव संकलन गरेर संशोधित संविधान संसद्मार्फत पारित गर्नुपर्ने प्रस्ताव गरेको छ। संशोधनपछि मात्र नयाँ प्रतिनिधिसभा निर्वाचनमा जानुपर्ने पार्टीको माग छ।
त्यसैगरी, तत्काल सरकारबाट गर्नुपर्ने कार्यका रुपमा पार्टीले शक्तिशाली छानबिन आयोग, न्यायिक भ्रष्टाचार अनुसन्धान आयोग र नागरिकता छानबिन आयोग गठन गर्ने, गरिबीको आधारमा श्रमकार्ड वितरण गर्ने, नेपाली उत्पादनलाई प्राथमिकता दिने र विवादास्पद ‘एम्बुस्ट’ नम्बर प्लेट खारेज गर्नेजस्ता ११ बुँदे माग अघि सारेको छ।
‘हिंसा, अराजकता र गैर–लोकतान्त्रिक बाटोले होइन, संविधान संशोधन र शान्तिपूर्ण संवादबाट मात्रै असन्तुष्टि सम्बोधन हुन्छ,’ विज्ञप्तिमा भनिएको छ।
