काठमाडौं : लगातारको वर्षा र पहिरोले देशका सात राजमार्गमा आवागमन अवरुद्ध बनेको छ ।
नेपाल प्रहरीले पहिरो पन्छाउने प्रयास जारी राखिएको भए पनि अधिकांश स्थानमा सडक सञ्चालन अनिश्चित बनेको जनाएको छ । प्रहरी नायब महानिरीक्षक तथा प्रवक्ता विनोद घिमिरेका अनुसार कोशी राजमार्गको भोटखोला र मकालु गाउँपालिकाको एकुवामा सडक पूर्णरूपमा बन्द छ ।
सिद्धिचरण लोकमार्गको कटारी नगरपालिका–८ सिरिसेमा पनि यातायात रोकिएको छ । त्यस्तै, रसुवामा चीनसँग जोड्ने मितेरी पुल बाढीले कटान भएपछि आवागमन अवरुद्ध भएको छ । अरनिको राजमार्गअन्तर्गत सिन्धुपाल्चोकको भोटेकोशी गाउँपालिकाका कोदारी र डाक्लाङमा पहिरो खसेपछि दुवै स्थानमा बाटो बन्द छ ।
चितवनको इच्छाकामना गाउँपालिका–५ तुइन खोलामा खसेको निरन्तर पहिरोले नारायणगढ–मुग्लिन सडकसमेत अवरुद्ध भएको छ । अन्य केही सडक, जस्तै कालीगण्डकी करिडोर, रत्न राजमार्ग, पूर्व–पश्चिम राजमार्ग र गल्छी–त्रिशूली सडक भने जोखिमका बीच आंशिक रूपमा एकतर्फी सञ्चालनमा रहेका छन् ।
