काठमाडौं : प्रधानमन्त्री सुशीला कार्कीले मन्त्रिपरिषद् थप विस्तार गर्दै पाँच नयाँ मन्त्रीको नाम राष्ट्रपति समक्ष सिफारिस गरेकी छन्। आइतबार बसेको मन्त्रिपरिषद् बैठकपछि प्रधानमन्त्री कार्कीले राष्ट्रपति रामचन्द्र पौडेललाई नयाँ मन्त्रीहरूको नाम पठाएकी हुन्।
सिफारिसअनुसार अनिलकुमार सिन्हालाई उद्योग, वाणिज्य तथा आपूर्ति, कानुन, न्याय तथा संसदीय मामिला, भूमिसुधार, सहकारी तथा गरिबी निवारण मन्त्रालयको जिम्मेवारी दिने निर्णय भएको छ। त्यस्तै प्रख्यात आविष्कारक महावीर पुनलाई शिक्षा, विज्ञान तथा प्रविधि मन्त्रालयको नेतृत्व दिन सिफारिस गरिएको छ।
यस्तै मदनप्रसाद परियारलाई कृषि तथा पशुपन्छी विकास, जगदीश खरेललाई सञ्चार तथा सूचना प्रविधि र संगीता मिश्रालाई स्वास्थ्य मन्त्रालयको जिम्मेवारी दिने सिफारिस गरिएको छ।
सिफारिस भएका पाँचै मन्त्रीको शपथग्रहण सोमबार हुने राष्ट्रपति कार्यालयले जनाएको छ। प्रधानमन्त्री कार्कीले मन्त्रिपरिषद् विस्तारसँगै सरकारलाई थप कार्यगत रूपमा सक्रिय बनाउने अपेक्षा गरिएको छ।
