सोलुखुम्बु : सोलुखुम्बुको माप्य दूधकोशी गाउँपालिका र महाकुलुङ गाउँपालिकाको सिमानामा बिहीबार साँझ बोलेरो जिप दुर्घटना हुँदा तीन जनाको मृत्यु भएको छ। दुर्घटनामा चालकसहित छ जना घाइते भएका छन्।
माप्य दूधकोशी गाउँपालिका–६ र ७ को बीचमा पर्ने भिरकुना नामक स्थानमा बोलेरो जिप करिब चार सय मिटर तल खसेको वडा नंवर ७ का अध्यक्ष सगुजित राईले बताए । राईका अनुसार, बोलेरो जिप खुम्बुबाट महाकुलुङतर्फ जाँदै गरेको यात्रु लिन माप्य पुगेको थियो।
फर्कने क्रममा साँझ साढे ७ बजेतिर दुर्घटना भएको हो। दुर्घटनामा घाइते भएका सबैलाई उपचारका लागि वाकु अस्पताल लगिएको जिल्ला प्रहरी कार्यालय सोलुखुम्बुले जनाएको छ। रातिको समयमा दुर्घटना भएकाले मृतकहरूको पहिचान खुल्न बाँकी रहेको प्रहरीको भनाइ छ।
