काठमाडौँ : नेपाल कम्युनिस्ट पार्टी (माओवादी)ले देशभर बढ्दै गएको जल, जमिन र जंगलमाथिको अतिक्रमणप्रति गम्भीर ध्यानाकर्षण भएको जनाएको छ। पार्टीले प्राकृतिक स्रोतको संरक्षणमा सबै पक्ष जिम्मेवार बन्नुपर्ने बताएको हो ।
पार्टीको केन्द्रीय समितिद्वारा जारी प्रेस विज्ञप्तिमा जल, जमिन र जंगलमाथि भइरहेको दोहनका कारण स्थानीय स्वशासन र जनजीवनमा नकारात्मक असर परेको उल्लेख गरिएको छ। विज्ञप्तिमा प्रकृतिमाथिको अन्धाधुन्ध दोहन रोक्न आवश्यक कानुनी मापदण्डको पालना गर्न सम्बन्धित सबै निकायलाई आग्रह गरिएको छ।
माओवादीले स्थानीय सरकार सञ्चालन ऐन २०७४ ले तोकेका मापदण्डअनुसार क्रसर, हाइड्रोपावर र खानीजस्ता संरचनाहरू सञ्चालन गर्न अनुरोध गरेको छ। अन्यथा त्यसबाट उत्पन्न हुने परिणामको जिम्मेवारी सम्बन्धित पक्ष स्वयंले लिनुपर्ने चेतावनी महासचिव गौरवद्वारा जारी विज्ञप्तिमा भनिएको छ ।
देश र जनताको पक्षमा संघर्षरत रहेको दाबी गर्दै माओवादी केन्द्रले प्राकृतिक स्रोतको संरक्षणलाई प्राथमिकतामा राख्दै जनताको आवाज बुलन्द गर्दै जाने प्रतिबद्धता जनाएको छ।
