काठमाडौं : पूर्वराष्ट्रपति विद्यादेवी भण्डारीले आफू सक्रिय राजनीतिमा फर्किने निर्णयबाट पछि नहट्ने अडान लिएकी छन् ।
नेकपा एमालेले उनलाई पार्टीको सक्रिय राजनीतिमा फर्कन नदिने निर्णय गरेपछि उनले शुक्रबार पत्रकार सम्मेलन गर्दै आफ्नो अडान सार्वजनिक गरेकी हुन्। यो कदमलाई एमाले नेतृत्वमाथि दबाब सिर्जना गर्ने प्रयासका रूपमा विश्लेषण गरिएको छ ।
भण्डारीले पत्रकार सम्मेलनमा पार्टीका नेता तथा कार्यकर्ताहरूलाई पार्टी निर्माणमा सक्रिय हुन आह्वानसमेत गरिन्। उनले आफूले एमालेको सदस्यता विधिपूर्वक नवीकरण गरिसकेको बताउँदै कुनै लालसा नभई देशका लागि थप योगदान दिन पार्टीमा फर्किन चाहेको दाबी गरिन्।
