काठमाडौं : सूर्यदर्शन सहकारीको रकम अपचलन प्रकरणमा जिल्ला अदालत कास्कीको धरौटी आदेश बदर गर्न माग गर्दै दायर मुद्दामा उच्च अदालत पोखराले बिहीबारदेखि सुनुवाइ सुरु गरेको छ।
जिल्ला अदालतले गत पुस २५ मा रवि लामिछानेसहितका सात जनालाई धरौटीमा रिहा गरेको थियो। तर सरकारी वकिल कार्यालय र केही निवेदकले आदेश बदर गर्दै थुनामा पठाउन माग गरेका हुन्। मुख्य न्यायाधीश रत्नबहादुर बागचन्द र न्यायाधीश दीपेन्द्र अधिकारीको संयुक्त इजलासमा भएको सुनुवाइ सबै पक्षको बहस नसकिएकाले भदौ ५ मा सारिएको हो।
प्रतिवादीहरूले साधारण तारेखमा छुटको माग गरेका छन्। अभियोगपत्रअनुसार सहकारीका १८ हजार ७ सय बचतकर्ताको जम्मा झन्डै १ अर्ब ३५ करोड रुपैयाँ अपचलन भएको आरोप छ । तीमध्ये लामिछानेमाथि ३ करोड ३७ लाख रुपैयाँको बिगो दाबी गरिएको छ।
