काठमाडौँ : अन्तर्राष्ट्रिय मानव अधिकार संगठन, अर्जेन्टिनाले प्राध्यापक मोहम्मद रमजान अली मियाँलाई ‘मानव अधिकार अन्तर्राष्ट्रिय सम्बन्धमा उत्कृष्टताको अन्तर्राष्ट्रिय प्रमाणपत्र’ प्रदान गरेको छ।
संगठनले मानवताको सेवामा उहाँले पुर्याएको निरन्तर योगदान, मानव अधिकारको रक्षा तथा आपसी सम्मान र सहकार्यमा आधारित अन्तर्राष्ट्रिय सम्बन्ध सुदृढीकरणमा देखाएको अथक प्रयासलाई कदर गर्दै सम्मान गरेको हो। प्रमाणपत्रमा भनिएको छ-‘प्रा.मियाँले देखाउनुभएको दूरदर्शी नेतृत्व र अनौठा पहलहरूले बढ्दो मानवीय तथा न्याय सम्बन्धी चुनौतीबीच नैतिक प्रतिबद्धता र जिम्मेवार मानव अधिकार कार्यको उत्कृष्ट नमुना प्रस्तुत गरेको छ’।
संगठनका अनुसार प्रा. मियाँले मानव अधिकारका सार्वभौम मूल्यहरूलाई केवल सैद्धान्तिक तहमा सीमित नगरी व्यवहारमा रुपान्तरण गर्ने उल्लेखनीय प्रयास गर्दै आएका छन्। उहाँले राष्ट्र, समुदाय र जनजाति बीच आपसी समझदारी र सहअस्तित्वका लागि पुल निर्माण गर्ने अभियानलाई निरन्तरता दिएको संगठनको अभिमत छ। यस क्रममा उहाँको भूमिकाले समाजलाई गौरव, चेतना र एकताको साझा मूल्यतर्फ अघि बढाएको प्रमाणपत्रमा उल्लेख गरिएको छ। संगठनले प्रा. मियाँलाई मानवताको सेवामा अग्रणी व्यक्तित्वका रूपमा वर्णन गर्दै न्यायपूर्ण, सचेत र एकताबद्ध संसार निर्माणमा उहाँको योगदानलाई उच्च सम्मान व्यक्त गरेको छ।
संगठनका अध्यक्ष डा. नेमसिहं प्रेमी, उपाध्यक्ष डा. मोहम्मद बरोहामी र महासचिव नादेजा चिलिप्नेङ्गोले संयुक्त रूपमा प्रमाणपत्रमा हस्ताक्षर गरेका छन्। कतारस्थित अन्तर्राष्ट्रिय मानव अधिकार संगठनले विभिन्न राष्ट्रका मानव अधिकारकर्मी तथा विज्ञहरूलाई विश्वभर मानव अधिकारको संवर्द्धन र अन्तर्राष्ट्रिय सम्बन्धको मजबुतीका लागि योगदान पुर्याएबापत समय-समयमा सम्मान गर्दै आएको छ। यस वर्ष उक्त सम्मान नेपालका प्रा. मियाँले पाएका हुन् ।
नेपालको काठमाडौ जिल्ला कागेश्वरी मनोहरा ४ डाँछी ठेगाना भएका मियाँ कतारमा दुई दशक भन्दा बढी समयदेखि कार्यरत छन् । उनका अरबी भाषा विवेचना इस्लाम दर्शन मानवअधिकार उर्दु साहित्य अरबी साहित्य सम्बन्धी पुस्तक समेत प्रकाशित छन् ।
यो पुरस्कार आगामी १० डिसेम्बर अन्तर्राष्ट्रिय मानवअधिकार दिवसको दिनमा प्रदान गरिने बताइएको छ ।।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |