काठमाडौँ : नेपाली कांग्रेस केन्द्रीय सदस्य तथा वातावरण तथा जलवायु परिवर्तन सरोकार विभाग प्रमुख कल्याण गुरुङले पार्टीले अब संघीय, प्रदेश र स्थानीय तहका आगामी निर्वाचनलाई प्राथमिकतामा राखेर द्रुत गतिमा काम अघि बढाउनुपर्ने बताएका छन्।
पिटिओ खबरसँग कुराकानी गर्दै उनले निर्वाचनलाई लक्ष्य नबनाई गरिएको गतिविधि परिणाममुखी नहुने भन्दै मतदाताको मनस्थिति बुझेर रणनीति तय गर्न आवश्यक रहेको बताए। ‘मतदाता आधारलाई यथास्थितिमा राख्नु मात्र हैन, अझ विस्तार गर्ने उपायतर्फ कांग्रेस गम्भीर हुनुपर्छ,’ उनले भने, ‘संख्या नघट्ने गरी नयाँ मतदाता आकर्षित गर्न सक्ने अभियानमा पार्टीले जोड दिनुपर्छ।’
गुरुङका अनुसार कांग्रेसले संगठन सुदृढीकरण, उम्मेदवार छनोटको पारदर्शी प्रक्रिया र स्थानीयस्तरमा जनतासँग प्रत्यक्ष सम्पर्कलाई बल दिन सके मात्र आगामी निर्वाचनमा सफलता हात पार्न सक्नेछ। उनले विगतका निर्वाचनमा कांग्रेसप्रति देखिएको विश्वासलाई अझ मजबुत बनाउन नेतृत्वले स्पष्ट कार्ययोजना ल्याउनुपर्ने धारणा राखे।
उनले पार्टीको संगठनात्मक संरचना बलियो भए मात्र चुनावी प्रतिस्पर्धामा टिका रहन सकिने बताए । उनले आन्तरिक एकता र साझा दृष्टिकोणमार्फत मात्र कांग्रेसले जनताको विश्वास जित्ने बताउँदै आगामी निर्वाचनलाई केन्द्रबिन्दु बनाएर सक्रिय अभियान सुरु गर्न नेतृत्वलाई आग्रह गरे।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |