बिपी राजमार्ग सञ्चालनमा आउन नसक्दा यात्रुहरू मारमा

काभ्रे : रोशी खोलाको बाढीले क्षतविक्षत बनाएको बिपी राजमार्ग अझै सञ्चालनमा आउन नसक्दा यात्रुहरू मारमा परेका छन्। लगातारको वर्षाले बनाइएका अस्थायी डाइभर्सनसमेत बगाएपछि राजमार्ग पुनः अवरुद्ध भएको हो।

गत शनिबार ९१२ गते० साँझ आएको बाढीले विभिन्न स्थानमा सडक संरचना बिगारेपछि आइतबार दिनभर डाइभर्सन निर्माण गरिएको थियो। तर आइतबार ९१३ गते० साँझ पुनः परेको वर्षाले ती डाइभर्सन फेरि बगाउँदा समस्या थप जटिल बनेको छ। विशेषगरी चिउरीबास, नार्के र चार सय बेँसी क्षेत्रमा बनाइएका डाइभर्सन पूर्ण रूपमा क्षतिग्रस्त भएका छन्।

इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीका अनुसार रोशी खोलाले बगाएका १३ स्थानमध्ये ८ स्थानमा आइतबारसम्म डाइभर्सन निर्माण गरिएको थियो। तर साँझको वर्षाले तीमध्ये धेरैजसो पुनः बिगारेपछि सोमबार बिहानदेखि पुनर्निर्माण कार्य फेरि सुरु गरिएको छ।
शनिबार आएको बाढीले चौकीडाँडा, घुमाउने, चार सय बेँसी, गिम्दी बेँसी, नार्के, चिउरीबास, बोक्सीकुना, कालढुंगा, डालाबेशी, बुलढुंगा र माम्ती क्षेत्रमा डाइभर्सन बगाएको थियो। यस्तै सिन्धुलीतर्फ आँपघारी र नेपालथोकमा पनि सडक अवरुद्ध भएको छ।

प्रहरीका अनुसार सडक डिभिजन कार्यालय र ठेकेदार कम्पनीले मौसममा सुधार आउनेबित्तिकै क्षतिग्रस्त डाइभर्सन मर्मत गरी यातायात सुचारु गर्ने तयारी गरिरहेका छन्। तर निरन्तरको वर्षा नरोकिएसम्म पूर्ण रूपमा सञ्चालन कहिलेबाट सुरु हुन्छ भन्ने अझै अनिश्चित बनेको छ।