राप्रपामा भाँडभैलो ,सुवेदीलाई हटाएको निर्णयविरुद्ध निर्वाचन आयोग जाने

काठमाडौं :  राप्रपा अध्यक्ष राजेन्द्र लिङ्देनले अनुशासन समितिको अध्यक्षबाट नवराज सुवेदीलाई हटाएपछि पार्टीभित्र असन्तुष्टि चुलिएको छ। असार २५ गतेको निर्णयविरुद्ध सुवेदी आइतबार बिहान निर्वाचन आयोगमा औपचारिक उजुरी दिने तयारीमा छन्।

सुवेदी हाल हिन्दुराष्ट्र र राजसंस्था पुनर्स्थापनाका लागि गठित संयुक्त जनआन्दोलन समितिका संयोजक हुन्। उनकै नेतृत्वमा राप्रपावादी शक्ति आन्दोलनरत रहँदा अध्यक्ष लिङ्देनले एकाएक हटाएको निर्णयले इतर समूह असन्तुष्ट बनेका छन्। शनिबार महामन्त्री धवलशमशेर राणाको अपार्टमेन्टमा बसेको इतर समूहको बैठकले लिङ्देनको निर्णयलाई विधानविपरीत ठहर गर्दै निर्वाचन आयोगमा जाने निष्कर्ष निकालेको हो।

यसअघि लिङ्देनले उपाध्यक्ष रोशन कार्कीलाई अनुशासन समितिको अध्यक्ष बनाएका थिए भने प्रवक्ता सगुन लावतीलाई पनि पदबाट हटाएका थिए। लिङ्देनको पछिल्ला निर्णयहरू आफ्नो आलोचकहरूमाथिको दमनको रूपमा देखिएको नेताहरूको आरोप छ।