काठमाडौं : नेकपा एकीकृत समाजवादीको आन्तरिक विवाद थप चर्किएको छ। स्थायी कमिटी सदस्य रामकुमारी झाँक्रीले आफूलाई पार्टीबाट कुनै प्रकारको स्पष्टीकरण सोधिएको छैन भन्ने दाबी गरेकी छिन् भने, उपाध्यक्ष जगन्नाथ खतिवडाले पार्टीको अनुशासन आयोगमार्फत स्पष्टीकरण सोधिएको स्पष्ट पारेका छन्।
तर झाँक्रीले भने त्यसलाई अस्वीकार गर्दै कुनै पनि लिखित वा मौखिक रूपमा स्पष्टीकरण नआएको स्पष्ट पार्दै आजको स्थायी कमिटी बैठकमा आफ्नो पक्ष राख्न समय मागेकी थिइन्। तर महासचिव घनश्याम भुसालको स्वास्थ्य समस्या देखाउँदै बैठक २२ गते ११ बजेसम्मका लागि स्थगित गरिएको हो।
झाँक्रीले अध्यक्ष माधवकुमार नेपालविरुद्ध ‘सिनो बोकेर हिँड्न सकिँदैन’ भन्ने अभिव्यक्तिसँगै अर्ली महाधिवेशनको माग गरेपछि पार्टीभित्र आन्तरिक असहमति गहिरिएको हो। यही अभिव्यक्तिलाई लिएर झाँक्रीमाथि स्पष्टीकरण सोधिएको दाबी गरिएको छ।
अब स्थगित बैठकमा झाँक्रीले आफ्ना धारणा राख्ने सम्भावना छ भने, पार्टीभित्रको शक्ति सन्तुलन कसरी अघि बढ्छ भन्ने चासो उब्जिएको छ ।
