नवलपरासी : पूर्व–पश्चिम राजमार्ग अन्तर्गत पूर्वी नवलपरासीको मध्यबिन्दु नगरपालिका–८ चोरमारा बजारमा रहेको गिरुबारी पुल भासिँदा यातायात अवरुद्ध भएको छ।
सोमबार राति करिब ९ बजे ओभरलोड ट्रक पुलको बीच भागमा पुगेका बेला पुलको पूर्वपट्टि भासिएपछि सडक अवरुद्ध भएको जिल्ला प्रहरी कार्यालय नवलपरासी पूर्वले जनाएको छ । पुल भासिएपछि लामो तथा छोटो दुरीका सबै सवारी साधन रोकिएका छन्।
यातायात अवरुद्ध भएपछि सवारी साधनहरू करिब ३ किलोमिटर दक्षिणतर्फ रानीबारी हुँदै वैकल्पिक बाटो प्रयोग गरेर आवतजावत गरिरहेका छन्। प्रहरी कार्यालयले सवारी साधनहरूलाई सावधानीपूर्वक वैकल्पिक मार्ग प्रयोग गर्न आग्रह गरेको छ।
