काठमाडौं : जडिबुटीमा रोकिराखेको बसमा ठोक्किँदा दुई युवकले ज्यान गुमाएका छन्। शुक्रबार बिहान कोटेश्वरबाट जडिबुटीतर्फ जाँदै गरेको लु ४३ प ४९३८ नम्बरको स्कुटर जडिबुटी पुलमा पार्किङ गरिएको बा प्र ०१–००६ ख ४२४३ नम्बरको अरनिको यातायातको बसको पछाडि ठोक्किएको जिल्ला प्रहरी परिसर काठमाडौंले जनाएको छ ।
ठक्करबाट गम्भीर घाइते भएका स्कुटर चालक नवलपरासी सुनौल ०१ घर भई हाल भक्तपुर लोकन्थली बस्ने २२ वर्षीय शिरिस पौडेल र पछाडि सवार काभ्रेपलाञ्चोक पाँचखाल ०२ का २३ वर्षीय नितेश नेपाललाई उपचारका लागि ट्रमा सेन्टर लगिएको थियो। तर दुवैको उपचारका क्रममा मृत्यु भएको प्रहरीको भनाइ छ।
बस र स्कुटर दुवै कोटेश्वर ट्राफिकको नियन्त्रणमा छन् भने चालक २५ वर्षीय सुभाष तामाङ बानेश्वर प्रहरी वृत्तमा राखिएको छ।
