एमाले विधान महाधिवेशन आज सकिँदै

ललितपुर :  नेकपा (एमाले) को दोस्रो विधान महाधिवेशन आइतबार सकिँदैछ। गोदावरीस्थित सनराइज हलमा दुई दिनदेखि जारी महाधिवेशनको बहस अध्यक्ष केपी शर्मा ओलीले प्रस्तुत गरेको ‘नेपाली विशेषताको समाजवाद’ शीर्षकको दस्तावेजलाई केन्द्रमा राखेर छलफल भएको छ ।

महाधिवेशनमा प्रस्तुत राजनीतिक, संगठनात्मक र विधान संशोधनलगायत प्रतिवेदनमाथि प्रदेश र केन्द्रीय संरचनाका आधारमा बनाइएका १० समूहले शनिबार दिनभर छलफल पूरा गरेका छन्। सहभागीहरूले दिएका सुझावसहितको प्रतिवेदन आइतबार समूह नेताले हलमा पेश गर्ने तयारी छ।

प्रचार विभाग प्रमुख जगन्नाथ गौतमका अनुसार छलफलमा सदस्यता विस्तार, संगठनात्मक संरचना, अनुशासन, संघीयता, आर्थिक अवस्था र आगामी निर्वाचनसम्मका विषय उठेका छन्। सहमति नजुटेका प्रस्तावमा मतदानमार्फत टुङ्गो लगाइने एमाले नेतृत्वले जनाएको छ।

अध्यक्ष ओलीले प्रस्तुत गरेको राजनीतिक प्रतिवेदन, महासचिव शङ्कर पोखरेलको संगठनात्मक प्रतिवेदन र उपाध्यक्ष विष्णु पौडेलको विधान संशोधन प्रस्तावसमेत समूहगत छलफलमा परेका थिए।

महाधिवेशनले आन्तरिक बहसबाट संगठनलाई सुदृढ बनाउँदै आगामी राजनीतिक यात्रामा निर्णायक भूमिका तय गर्ने एमालेको दाबी छ।