तुइन खोलामा भीषण पहिरो, मुग्लिन-नारायणगढ सडक अवरुद्ध

काठमाडौं :  मुग्लिन-नारायणगढ सडकखण्डअन्तर्गत तुइन खोलामा मंगलबार राति ठूलो पहिरो खस्दा राजमार्ग पूर्णरूपमा अवरुद्ध भएको छ। सडक बन्द भएपछि दैनिकजसो सास्ती भोग्दै आएका यात्रु दशैँको बेलामा झन् मारमा परेका छन्।

बुधबार बिहानदेखि पहिरो पन्छाउने काम सुरु भए पनि दिनभर राजमार्ग पूर्ण रूपमा सञ्चालन हुने सम्भावना कम छ। निरन्तर ढुङ्गा खसिरहेको कारण नियमित यातायात सञ्चालन गर्न कठिनाइ भएको सडक डिभिजन भरतपुरले जनाएको छ ।
जिल्ला प्रशासन कार्यालय चितवनले यात्रुहरूलाई वैकल्पिक मार्ग प्रयोग गर्न आग्रह गरेको छ। महोत्तरीको बर्दिवास, मकवानपुरको हेटौंडा, रूपन्देहीको बुटवल, नवलपरासी बर्दघाट सुस्ता पूर्वको कावासोती र गैंडाकोट, धादिङको नौबिसे तथा तनहुँको खैरेनीटार हुँदै गन्तव्यतर्फ जान सकिने जनाएको छ।

यस सडकखण्डमा केही दिनयता निरन्तर पहिरो खस्दै आएकाले समयमै यात्रा गर्न नपाउने यात्रु थप पीडित बनेका छन्। दशैँका बेला बाटो बन्द हुँदा सर्वसाधारणलाई ठूलो समस्या परेको स्थानीय प्रशासनले जनाएको छ।