काठमाडौं : आईसीसी विश्व क्रिकेट लिग–२ अन्तर्गत यूएईमा जारी एकदिवसीय (ओडिआई) त्रिदेशीय शृंखलाको अन्तिम खेलमा नेपाल आज यूएईसँग खेल्दैछ।
दुबईस्थित आईसीसी एकेडेमी मैदानमा हुने खेलमा नेपाल सान्त्वना जितको खोजीमा छ । खेल नेपाली समय अनुसार बिहान सवा ११ बजे सुरु हुनेछ।
शृंखलामा नेपालले लगातार तीन पराजय व्यहोरेको थियो । पहिलो खेलमा नेपाल अमेरिकासँग १०६ रनले पराजित भएको थियो। दोस्रो खेलमा यूएईसँग ५ विकेट र तेस्रो खेलमा फेरि अमेरिकासँग ४ विकेटले हार बेहोरेको थियो।
लिग–२ को अंकतालिकामा अमेरिका २४ खेलमा ३६ अंकसहित शीर्ष स्थानमा छ। नेपालले १९ खेलमा १२ अंक जोड्दै सातौँ स्थानमा रहेको छ भने यूएई ८ अंकका साथ पुछारमा छ।
आजको खेलका लागि नेपालले प्लेइङ ११ मा केही परिवर्तन गर्न सक्ने अनुमान गरिएको छ। पछिल्ला खेलमा खराब फर्ममा रहेका ब्याट्सम्यान आरिफ शेखको स्थानमा अनिल साहले मौका पाउने सम्भावना छ।
त्यस्तै बाँयाहाते स्पिनर ललित राजवंशीले किफायती बलिङ गरे पनि विकेट ननिकालेपछि उनको स्थानमा शाहब आलमलाई समावेश गर्ने तयारी रहेको स्रोतले जनाएको छ।
