केशवप्रसाद चौलागाईं
“शस्त्रे–शास्त्रे च कौशलम्” भन्ने नारा सहित ब्राह्मण अन्तर्राष्ट्रिय संगठन ट्रस्ट (पंजीकृत) को ११औँ अन्तर्राष्ट्रिय महाधिवेशन काठमाडौंमा सुरु भएको छ। संरक्षक संहिता शास्त्री अर्जुन बाँस्तोलाको सभापतित्वमा सञ्चालित महाधिवेशन तीन दिन—मंसिर १२, १३ र १४—सम्म चल्नेछ।
यस महाधिवेशनमा भारत, पाकिस्तान, हल्याण्ड (नेदरल्याण्ड) लगायत देशबाट प्रतिनिधिहरूको सहभागिता रहेको छ। भारतका स्वर्गीय आचार्य प्रभाकर मिश्रद्वारा स्थापित यस ब्राह्मण अन्तर्राष्ट्रिय संगठनको नेपाल अध्यायका अध्यक्ष प्रा। डा। माधव भट्टराईले ब्राह्मण समुदायको शास्त्रीय महत्त्व, वर्तमान उपेक्षित अवस्था तथा आवश्यक एकताको विषयमा प्रकाश पार्दै सहभागीहरूलाई जागृत गर्नुभयो।
महाधिवेशनको उद्घाटन पशुपतिनाथका अर्चक (पुजारी) श्री गिरिश भट्ट शास्त्रीले दीप प्रज्वलन तथा वैदिक वटुकहरूको स्वस्तिवाचनसहित सम्पन्न भयो।
कार्यक्रमका विशिष्ट अतिथि सर्वोच्च अदालतका पूर्व प्रधानन्यायाधीश गोपाल पराजुलीले “लोका समस्ता सुखिनो भवन्तु” जस्तो समस्त प्राणीमात्राको कल्याण चाहने उदार सिद्धान्त हिन्दू धर्ममै पाइने उल्लेखनीय आदर्श भएको बताउनुभयो।
यसैगरी, त्यस आदर्शका आधारमा–
क्रोधलाई क्रोधले होइन, संयमले समाधान गर्नु ब्राह्मणको मूल लक्षण भएको,
‘फ्युडल’ जस्ता शब्द समयक्रममा शोषणको प्रतीक बनेझैँ, सञ्चार माध्यमहरू पनि आधारहीन सूचनाका कारण अपमानित हुन सक्ने भएकाले सकारात्मक पक्षलाई महत्त्व दिनुपर्ने,
जस्ता विषयहरूमा उहाँले जोड दिनुभयो।
पूर्वन्यायाधीश पराजुलीले ऋषिपुत्रहरूको गौरवशाली परम्परा प्रति नतमस्तक हुँदै सम्मान र गर्वको भावना सबैमा जागृत हुनुपर्ने विचार पनि व्यक्त गर्नुभयो।
