देशभक्त नेपालीले सेनाको विरोध गर्न सक्दैन

काठमाडौँ : पूर्व कर्णेल सन्तोषजङ्ग ठाकुरले देशभक्ति र नेपाली सेनाबीचको सम्बन्धलाई लिएर कडा अभिव्यक्ति दिएका छन्। उनका अनुसार साँचो देशभक्तले कुनै पनि परिस्थितिमा नेपाली सेनाको विरोध गर्न सक्दैनन्। पिटिओ खबरसँगको कुराकानीमा उनले नेपालको सार्वभौमसत्ता र राष्ट्रिय सुरक्षाको प्रमुख आधारका रूपमा सेनालाई प्रस्तुत गर्दै, सेनामाथि उठाइने आलोचना देशप्रतिको निष्ठासँग मेल नखाने जिकिर गरे।

ठाकुरले नेपाली सेना मुलुकको अखण्डता र स्थायित्वको महत्वपूर्ण स्तम्भ भएको उल्लेख गर्दै, बाह्य र आन्तरिक चुनौतीहरू सामना गर्न सेना सक्षम रहेको बताए। उनले राजनीतिक परिवर्तनका क्रममा सेनाको भूमिकालाई कमजोर पार्ने वा अविश्वास गर्ने प्रवृत्तिप्रति असन्तुष्टि जनाउँदै, यस्तो प्रवृत्तिले राष्ट्रिय सुरक्षामा असर पार्न सक्ने चेतावनी पनि दिए।

उनका अनुसार २०६२र६३ को जनआन्दोलनपछि आएको राजनीतिक परिवर्तनले देशको शक्ति संरचनामा ठूलो फेरबदल ल्यायो। विशेषगरी राजतन्त्रको अन्त्यसँगै नेपाली सेनाले आफ्नो पारम्परिक अभिभावक गुमाएको उनले टिप्पणी गरे। “राजा हुँदा सेनाले आफूलाई अभिभावकको संरक्षणमा रहेको महसुस गर्थ्यो,” उनले भने, “तर राजतन्त्र समाप्त भएपछि सेनाले त्यो आधार गुमायो, जसले संस्थागत रूपमा पनि प्रभाव पारेको छ।”

ठाकुरले वर्तमान सन्दर्भमा सेनालाई अझ सुदृढ र आत्मनिर्भर बनाउनु आवश्यक रहेको औँल्याउँदै, राष्ट्रिय एकता र सुरक्षा सुदृढ गर्न सबै पक्ष एकजुट हुनुपर्नेमा जोड दिए। साथै, उनले देशभक्त नागरिकले सेनाप्रति सम्मान र विश्वास कायम राख्नुपर्ने धारणा व्यक्त गरे।

https://www.facebook.com/share/v/18fPXvCE77/