काठमाडौँ : वाग्मती प्रदेशका उद्योग, पर्यटन, श्रम तथा यातायात मन्त्री सुरेश श्रेष्ठले नेपाल आउने विदेशी, विशेष गरी भारतीय पर्यटकको सुरक्षा र सम्मानमा प्रदेश सरकार पूर्ण प्रतिबद्ध रहेको बताएका छन्।
जिल्ला होटल व्यवसायी संघ काठमाडौँ र इन्डो नेपाल टुरिजम वेलफेयर सोसाइटी भारतको संयुक्त आयोजनामा शुक्रबार आयोजित ‘अन्तर्राष्ट्रिय गौरव सम्मान २०२६’ कार्यक्रममा बोल्दै मन्त्री श्रेष्ठले नेपाली समाजको मूल मन्त्र ‘अतिथि देवो भवस्’ रहेकाले पर्यटकलाई भगवान् सरह मान्ने परम्परा रहेको बताए। काठमाडौँको सिनामंगलस्थित होटल रोयल बुटिकमा आयोजित कार्यक्रममा उनले भारतीय पर्यटकहरू नेपाल आउन हिचकिचाउनु पर्ने कुनै अवस्था नरहेको स्पष्ट पारे।
नेपालको पर्यटन विकास र आर्थिक समृद्धिका लागि भारत प्रमुख एवं प्राथमिक बजार रहेको बताउँदै मन्त्री श्रेष्ठले भारतीय सञ्चारमाध्यमहरूलाई नेपालका धार्मिक, सांस्कृतिक तथा प्राकृतिक सम्पदाको व्यापक प्रचारप्रसार गरिदिन आग्रह गरे। पशुपतिनाथ, मुक्तिनाथ, स्वयम्भू, चाँगुनारायण र लुम्बिनीजस्ता विश्व सम्पदा सूचीमा सूचीकृत स्थलहरू भारतीय पर्यटकका लागि प्रमुख आकर्षणको केन्द्र रहेको उनको भनाइ थियो।
मन्त्री श्रेष्ठले भारतबाट आउने पर्यटकहरूले सीमा तथा सडक यातायातका क्रममा भोग्नुपरेका कानुनी र व्यावहारिक जटिलताहरूप्रति सरकार गम्भीर रहेको र तिनको समाधानका लागि पहल भइरहेको जानकारी दिए। पर्यटन तथा होटल क्षेत्रमा देखिएका कमीकमजोरी सुधार गर्न प्रदेश सरकार तयार रहेको स्पष्ट पार्दै उनले भारतीय पत्रकारहरूबाट प्राप्त हुने रचनात्मक सुझावलाई सरकारले कार्यान्वयन गर्ने प्रतिबद्धता व्यक्त गरे।
जिल्ला होटल व्यवसायी संघ काठमाडौंका अध्यक्ष सुरेश बरालको अध्यक्षतामा सम्पन्न उक्त कार्यक्रममा नेपाल पर्यटन बोर्डका कार्यकारी निर्देशक हिक्मतसिंह ऐर, वातावरणविद् तथा पर्यटनविद् पि।के। शेर्पा, भारतीय पत्रकार जितेन्द्रपाल सिंह, होटल व्यवसायी महासंघ नेपालका अध्यक्ष शंकर भण्डारी, होटल तथा पर्यटन व्यवसायी संघ वाग्मती प्रदेशका अध्यक्ष दामोदर भण्डारी लगायतले नेपाल-भारत पर्यटन प्रवर्द्धनका विविध पक्षमा धारणा राखेका थिए।
कार्यक्रममा गोरखा ब्रुअरीका सेल्स डाइरेक्टर काजीमान सुब्बा, पर्यटनविद् खुमबहादुर सुवेदी, महासंघका प्रशासन प्रमुख ज्ञानु गजमेरसहित काठमाडौँ उपत्यकाका विभिन्न होटल व्यवसायी संघका अध्यक्ष तथा प्रतिनिधिहरूको बाक्लो उपस्थिति रहेको थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |