काठमाडौं : जेनजी आन्दोलनका क्रममा देशभर फैलिएको हिंसात्मक घटनाबारे सत्यतथ्य सार्वजनिक गर्न सरकारले छानबिन समिति बनाउने तयारी गरेको छ। सोमबार सिंहदरबारमा पदभार ग्रहण गर्दै गृहमन्त्री ओमप्रकाश अर्यालले यस्तो जानकारी दिएका हुन् ।
आन्दोलनमा ज्यान गुमाएका प्रति सम्मान प्रकट गर्दै सरकारले राष्ट्रिय शोक घोषणा गर्ने पनि उनले बताए । त्यस क्रममा राष्ट्रिय झण्डा आधा झुकाइने र मृतकका परिवारलाई काजकिरिया खर्चका रूपमा एक लाख रुपैयाँ दिने निर्णय भएको उनको भनाइ छ । साथै, मृतकको शव घर ठेगानासम्म पुर्याउने व्यवस्था मिलाइने छ।
भदौ २३ र २४ गते काठमाडौंसहित विभिन्न स्थानमा भएको जेनजी समूहको आन्दोलनमा हालसम्म ७२ जनाले ज्यान गुमाएका छन् भने सयौं घाइते उपचाररत छन्। संसद भवन, सिंहदरबार, राष्ट्रपति भवन, सर्वोच्च अदालत र व्यापारी भवनलगायतका संरचना आगजनीमा परेर क्षतिग्रस्त भएका छन्।
